უკრაინაში კორონავირუსის ეპიდემიის გამო დაწესებული კარანტინი 31 ივლისამდე გახანგრძლივდა. ამის შესახებ ქვეყნის პრემიერ-მინისტრმა დენის შმიგალმა მთავრობის სხდომის შემდეგ განაცხადა.

მან ხაზგასმით აღნიშნა, რომ გასული კვირების განმავლობაში უკრაინაში კორონავირუსის მქონე პაციენტთა რიცხვი მუდმივად იზრდება.

„საკარანტინე ზომების შემსუბუქება ზოგიერთმა ისე აღიქვა, როგორც კარანტინის გაუქმება. თუმცა ვირუსისგან საფრთხე არ შემცირებულა. დღეს, ხელისუფლებამ მოქმედი ადაპტირებული კარანტინი 31 ივლისამდე გაახანგრძლივა, რადგან ეს არის ყველაზე ეფექტური გზა კორონავირუსის გავრცელების საწინააღმდეგოდ“, - განაცხადა პრემიერმა.

ამასთან, მთავრობამ განაახლა მექანიზმი, რომლის თანახმადაც რეგიონებში კორონავირუსის მნიშვნელოვნად გავრცელების შემთხვევაში შეიძლება კარანტინი გამკაცრდეს.