როდის გაიხსენება კორონაპანდემიის საფრთხის ფონზე დახურული ფიტნეს-ცენტრები და საცურაო აუზები - ბიზნესომბუდსმენის აპარატი და შრომის ინსპექტირების დეპარტამენტი ბიზნესმენებთან შეხვედრებს განაგრძობს. მთავარი თემა კორონავირუსის პრევენციის მიზნით შემუშავებული რეკომენდაციებია.
დღეს იყო შეხვედრა ქსელური სპორტული კომპლექსების წარმომადგენლებთან. შეიქმნება სამუშაო პლატფორმა, რომლის ფარგლებშიც სპორტული კომპლექსების წარმომადგენლებთან კოორდინაციით შემუშავდება დარგის სპეციფიკაზე მორგებული რეკომენდაციები.
შეხვედრას 20-მდე ფიტნეს დარბაზის, ღია და დახურული აუზის წარმომადგენელი ესწრებოდა.
"გვქონდა მნიშვნელოვანი შეხვედრა ბიზნესის ერთ-ერთ სექტორთან, კერძოდ, სპორტულ-გამაჯანსაღებელ კომპლექსების წარმომადგენლებთან. მათთან შევთანხმდით, იმ პროცესზე, რომლითაც უნდა მივიდეთ, კონკრეტულ რეგულაციებამდე, რომელიც იქნება პრაქტიკაში აღსრულებადი, და რომელთა დაცვითაც, მოხდება სპორტულ-გამაჯანსაღებელი კომპლექსების გახსნა და ბიზნეს სექტორის ამუშავება," - განაცხადა მიხეილ დაუშვილმა.