ბოლო პერიოდში თბილისში კორონავირუსის შემთხვევები არ დაფიქსირებულა, თუმცა ამ დილით ერთბაშად 9 შემთხვევა გამოვლინდა. იგი სავარაუდოდ, უკავშირდება საბურთალოს ერთ-ერთ კორპუსში მომხდარ შემთხვევას. გუშინ გავრცელდა ინფორმაცია, რომ საცხოვრებელი სახლში კარანტინშია მოქცეული.

ინფექციური საავადმყოფოს კლინიკური დირექტორის მარინა ეზუგბაიას განცხადებით, ბოლო 24 საათში დაფიქსირებული 11 ახალი შემთხვევიდან, 2 არის ბოლნისის წყარო, ხოლო დანარჩენი 9 არის თბილისიდან, ერთ ადრე დადასტურებულ შემთხვევასთან კონტაქტირებული პირები.

"გრძელდება კვლევა თუ არსებობს ამ წყაროში კიდევ ინფიცირებულები," - განაცხადა მარინა ეზუგბაიამ. ინფექციურ საავადმყოფოში ახალი შემთხვევებიდან 8 პაციენტი შევიდა.

"ჩვენთან 8 პაციენტია, თბილისის 8 შემთხვევა, ერთი კონტაქტის ყველა შემთხვევა ჩვენთან დაწვა, მათი მდგომარეობა საშუალოზე მსუბუქადაა შეფასებული," - განაცხადა მარინა ეზუგბაიამ. 

მან კომენტარი არ გააკეთა გავრცელებულ ინფორმაციასთან დაკავშირებით, რომ საბურთალოს ერთ-ერთ კორპუსში კორონავირუსის შემთხვევის დადასტურების შემდეგ მაცხოვრებლები კარანტინში მოექცნენ. მისი თქმით, ის დეტალებზე არ საუბრობს, თუმცა აცხადებს, რომ კონტაქტების კვლევა მიმდინარეობს, კორპუსის კარანტინი კი არასწორი ფორმულირებაა.