გასული დღე-ღამის განმავლობაში მსოფლიოში კორონავირუსით ინფიცირების 106 ათასი ახალი შემთხვევა დადასტურდა, რაც პანდემიის დაწყებიდან რეკორდული მაჩვენებელია. ამის შესახებ ჯანდაცვის მსოფლიო ორგანიზაციის გენერალურმა დირექტორმა, ტედროს ადჰანომ გებრეიესუსმა განაცხადა.

„ბოლო 24 საათის განმავლობაში 106 000 ახალი შემთხვევა დაფიქსირდა. ეს ყველაზე დიდი დღიური მაჩვენებელია პანდემიის არსებობის განმავლობაში. ამ შემთხვევების თითქმის 2/3 ოთხ ქვეყანაზე მოდის", - განაცხადა ჯანმოს გენერალურმა დირექტორმა.

მისივე თქმით, ჯანდაცვის მსოფლიო ორგანიზაცია შეშფოთებულია იმით, რომ კორონავირუსით ინფიცირების შემთხვევები მკვეთრად იზრდება იმ ქვეყნებში, სადაც მოსახლეობის შემოსავლების დონე საშუალო ან დაბალია.