ინფექციური საავადმყოფოს სამედიცინო დირექტორის, მარინა ეზუგბაიას განცხადებით, შემთხვევების რაოდენობის შედარებითი ზრდა შეზღუდვების მოხსნას არ უკავშირდება. ბოლო 24 საათში კორონავირუსის 18 ახალი შემთხვევა გვაქვს. აქედან 8 ბოლნისის მუნიციპალიტეტიდანაა.

„ძირითადად, ესაა სოფელი გეტა და სოფელი მუშევანი. კიდევ 8 უკვე დადასტურებული შემთხვევების კონტაქტებია და მხოლოდ 2 არის ახალი, საკარანტინო სივრციდან შემოსული.

შემთხვევების რაოდენობის შედარებითი ზრდა შეზღუდვების მოხსნას არ უკავშირდება, იმიტომ რომ ეს ძირითადად არის ბოლნისელი ინფიცირებულების კონტაქტები.

ამას შეზღუდვების მოხსნას ვერ დავუკავშირებთ, უბრალოდ ამ 2 პაციენტში გრძელდება კონტაქტების ძიება და დაავადების დიაგნოსტირება“, – განაცხადა ეზუგბაიამ.