ფშაველი-ომალოს დამაკავშირებელი გზის 36-ე კილომეტრზე, ზვავში მოყოლილი მოქალაქის საძიებო-სამაშველო ღონისძიებები მეორე დღეა მიმდინარეობს. საგანგებო სიტუაციების მართვის სამსახურის ცნობით, პროცესში ჩართულია 5 სახანძრო-სამაშველო ჯგუფი. რთული მეტეოროლოგიური პირობების გამო, არსებობს ზვავის გამეორებით ჩამოწოლის საშიშროება, რაც სამაშველო ოპერაციას აფერხებს.

ადგილზე მობილიზებული არიან ჰიდროლოგები. საძიებო-სამაშველო პროცესი მათი მეთვალყურეობითა და რეკომენდაციების მიხედვით მიმდინარეობს.

ზვავის ჩამოწოლის ადგილზე ტერიტორიის მონიტორინგი დრონის საშუალებით ხდება. კახეთის სახანძრო-სამაშველო ჯგუფების გარდა, შემთხვევის ადგილზე მუშაობენ განსაკუთრებულ საგანგებო სიტუაციებზე სწრაფი რეაგირების მთავარი სამმართველოს მაშველები თბილისიდან.

შემთხვევა თუშეთის გზის 36-ე კილომეტრზე გუშინ მოხდა. მეწყერი იმ დროს ჩამოწვა, როცა კომპანია „თუშეთის გზის" თანამშრომლები გზის გაწმენდაზე მუშაობდნენ.