პრემიერ-მინისტრ გიორგი გახარიას განცხადებით, ეკონომიკის გახსნის საკითხი მთავრობისთვის ნომერ პირველი პრიორიტეტია, თუმცა ეს დამოკიდებული იქნება ეპიდემიის ეფექტურად მართვაზე.
ამის შესახებ პრემიერ-მინისტრმა გიორგი გახარიამ მთავრობის დღევანდელ სხდომაზე განაცხადა.
ამასთან, როგორც პრემიერმა აღნიშნა, თითოეულ მოქალაქეს უნდა ესმოდეს, რომ პირბადე და სოციალური დისტანციის დაცვა ცხოვრების ნაწილი ხდება.
"ეკონომიკური აღორძინება, ეკონომიკის გახსნა, პოსტკრიზისული მართვა დღეს ჩვენი მთავრობის ნომერი პირველი პრიორიტეტია, მაგრამ პარალელურად, ეს შესაძლებლობა ჩვენ გვექნება მხოლოდ და მხოლოდ იმ შემთხვევაში, თუ ჯანდაცვის სამინისტრო ეფექტურად მართავს ეპიდემიის მენეჯმენტს.
ეს კრიტიკულად მნიშვნელოვანია და ამავდროულად, თითოეულ ჩვენს მოქალაქეს უნდა ესმოდეს, რომ ისეთი ახალი მოვლენები, არც თუ სასიამოვნო მოვლენები, როგორიც არის პირბადე, სოციალური დისტანცია, ჩვენი ცხოვრების ნაწილი ხდება. ამას ხაზგასმით ვიმეორებ, რადგან ეს არის ერთადერთი გზა და საშუალება, რომ ჩვენ ეკონომიკურ კონკურენციას გავუძლოთ და ეკონომიკური აღდგენის ნაწილში ეფექტურები ვიყოთ" ,- განაცხადა გიორგი გახარიამ.