შესაძლებელია, ხელახლა მოგვიწიოს შეზღუდვები მთელი ქვეყნის მასშტაბით - ამის შესახებ მთავრობის პრესსპიკერმა, ირაკლი ჩიქოვანმა უწყებათაშორისი საბჭოს სხდომის დასრულების შემდეგ განაცხადა.
მისი თქმით, გადაწყვეტილება ეპიდემიოლოგიური ვითარებიდან გამომდინარე იქნება მიღებული.
"გეგმა, რომელიც წარადგინა საქართველოს მთავრობამ, იყო თანმიმდევრული და მას გააჩნდა რამდენიმე ეტაპი, რომელშიც გარკვეული პერიოდი გვაქვს დასაცავი ეტაპებს შორის, თუმცა ხაზგასმით იქნა ნათქვამი და კიდევ ერთხელ გავიმეორებ, რომ ეპიდემიოლოგიური ვითარების შესაბამისად, შესაძლებელია, ჩვენ მოგვიწიოს ამ გეგმის როგორც დაჩქარებით მიღება, ასევე, ჩვენ არ გამოვრიცხავთ, თუ ეპიდემიოლოგიური ვითარება დამძიმდა ქვეყანაში, ხელახლა ავამოქმედოთ შეზღუდვები და ხელახლა მოგვიწიოს შეზღუდვები მთელი ქვეყნის მასშტაბით.
კიდევ ერთხელ მინდა, მოვუწოდო ჩვენს თანამოქალაქეებს, გაითვალისწინონ ყველა ის რეკომენდაცია, რომელიც არსებობს დღეს ქვეყანაში, მაქსიმალურად გაუფრთხილდნენ საკუთარ თავს და, რა თქმა უნდა, საკუთარ წრეს" - განაცხადა ირაკლი ჩიქოვანმა.