პირველი საუნივერსიტეტო კლინიკის დირექტორის, ლალი ტურძელაძის განცხადებით, ერთი პაციენტის მდგომარეობა განსაკუთრებით მძიმეა. ამის შესახემ მან ჟურნალისტებს ბრიფინგზე განუცხადა.

„კლინიკაში ამჟამად კორონავირუსით ინფიცირებული 94 პაციენტი გვყავს. აქედან 8 რეანიმაციულ განყოფილებაში რჩება, 7 აპარატზეა, აქედან ერთი ძალიან მძიმეა. 94 პაციენტიდან 47-ს ორმხრივი მწვავე პნევმონია აქვს", - აღნიშნა ტურძელაძემ.

მან მოსახლეობას რეკომენდაციების დაცვისკენ კიდევ ერთხელ მოუწოდა.

„კიდევ ერთხელ გთხოვთ, დარჩით სახლში, რომ პროცესები რაც შეიძლება ნელა განვითარდეს და ჩვენ ყველა პაციენტის მიღება შევძლოთ", - განაცხადა კლინიკის დირექტორმა.

საქართველოში კორონავირუსი 411 ადამიანს დაუდასტურდა, აქედან 98 უკვე გამოჯანმრთელდა, 5 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.