კლინიკა „თბილისის მედიცინის ინსტიტუტი" (TIM) დროებით დაიხურება, - ამის შესახებ კლინიკის დირექტორმა, გიორგი კაჭახიძემ განაცხადა.

„დღეს უკვე 5 პაციენტი გვყავდა დარჩენილი. ზოგი პაციენტი სხვადასხვა კლინიკაში გადავა, ზოგი - კარანტინში. თანამშრომლების დიდი ნაწილი კარანტინშია ახლა. როგორც კი გამოვალთ ყველა კარანტინიდან, მოხდება კლინიკის დეზინფექცია და გავაგრძელებთ მუშაობას", - განაცხადა კაჭახიძემ „ინტერპრესნიუსთან"

მისი ინფორმაციით, კლინიკაში ჯამში 9 ადამიანია დაინფიცირებული - 2 ექიმი, 5 ექთანი და 2 პაციენტი.

ცნობისთვის, დღეს კლინიკის დირექტორმა "ინტერპრესნიუსთან" განაცხადა, რომ კლინიკაში ორი პაცინეტის ინფიცირება, სავარაუდოდ, მედპერსონალისგან მოხდა. მისივე ინფორმაციით, კლინიკაში ინფექცია ერთ-ერთმა ექთანმა შეიტანა, რომელიც ძმისგან, სასულიერო პირისგან დაინფიცირდა.