სოფლის მეურნეობის მინისტრმა ლევან დავითაშვილმა ის 9 პროდუქტი დაასახელა, რომელზეც ფასებიც არ შეიცვლება, რასაც მთავრობა გააკონტროლებს.
„ჩვენ გუშინ განვაცხადეთ, რომ ვმუშაობდით საგანგებო მექანიზმზე, რომლითაც ძირითად სასურსათო პროდუქტებზე გავაკონტროლებდით ფასებს იმისთვის, რომ მოსახლეობისთვის ფასების ზრდა არ მოხდეს. ეს არის 9 მნიშვნელოვანი პროდუქტი. რადგანაც საზოგადოებაში არსებობს დიდი ინტერესი ჩამოგითვლით. ეს არის: ბრინჯი, მაკარონი, მზესუმზირის ზეთი, ფქვილი, შაქარი, ხორბალი, რძის ფხვნილი და ამას გუშინ სამუშაო რეჟიმში დაემატა ორი სასურსათო პროდუქტი: წიწიბურა და ლობიო.
ჩვენ სავალუტო რისკებისგან დაზღვევის მექანიზმი შევთავაზეთ ძირითად იმპორტიორებს, მსხვილ დისტრიბუტორებს, შევაჯერეთ ბიზნესთან ეს პოზიციები. ზუსტად ამიტომ ჩვენ დეტალებზე გუშინ არ ვისაუბრეთ. დღეს ჩვენ შეგვიძლია განვაცხადოთ, რომ მათ კონკრეტულად ფიქსირებულ საკურსო რეჟიმში შეგვიძლია გადავუზღვიოთ სავალუტო ფლუქტუაცია. განსხვავება კონკრეტული ფასიდან და კონკრეტული კურსიდან ჩვენ კომპენსაციის სახით შეგვიძლია ავუნაზღაუროთ ამ მსხვილ მომწოდებლებს, იმისთვის რომ მათ კონკრეტული ფასი შეინარჩუნონ ამ მნიშვნელოვან პროდუქტებზე, რომელზეც დამოკიდებულია ჩვენი მოსახლეობის ძირითადი ნაწილის სასურსათო მომარაგება", - განმარტა დავითაშვილმა.
მან ასევე დასძინა, რომ ფასები გუშინდელ მაჩვენებელზე შენარჩუნდება.