სენაკში, შონიას ქუჩაზე ზარანდიების ერთსართულიანი საცხოვრებელი სახლი სრულად დაიწვა. ამის შესახებ მუნიციპალიტეტის მერის წარმომადგენელმა გოჩა ჭანტურიამ განაცხადა.

მისივე ინფორმაციით, სახლიდან ოჯახის წევრებმა ნივთების გამოტანაც ვერ მოასწრეს.

„ეზოში იყვნენ. მუშაობდნენ. გვიან შეამჩნიეს ხანძარი. სახანძროც მოვიდა, მაგრამ ვერაფრის გადარჩენა ვერ მოხერხდა. ოჯახში ხანში შესული პირი და მისი ორი შვილიშვილი ცხოვრობს", - თქვა ჭანტურიამ.

ადგილზე მობილიზებულია სამაშველო-სახანძრო ბრიგადები. საგანგებო სიტუაციების მართვის სამსახურში ამბობენ, რომ მიმდინარეობს ხანძრის სალიკვიდაციო სამუშაოები.