არასრულლოვნისთვის თავისუფლების უკანონო აღკვეთის ბრალდებით პოლიციამ საგარეჯოს მუნიციპალიტეტში მცხოვრები ორი პირი დააკავა. ამის შესახებ ინფორმაცია Report.ge-ს შინაგან საქმეთა სამინისტროდან მიაწოდეს.

"დაკავებული არიან 2003 წელს დაბადებული ვ.ქ. და მისი ბიძაშვილი - 2001 წელს დაბადებული რ.ქ.", - ნათქვამია განცხადებაში.

გამოძიებით დადგინდა, რომ თანამზრახველებმა მიმდინარე წლის 5 თებერვალს, ცოლად მოყვანის მიზნით, საგარეჯოს მუნიციპალიტეტის სოფელ თულარში მცხოვრებ, 2004 წელს დაბადებულ გოგონას თავისუფლება უკანონოდ აღუკვეთეს.

სამართალდამცველებმა, ჩატარებული ოპერატიულ-სამძებრო ღონისძიებების შედეგად, გატაცებული გოგონას კვალს მალევე მიაგნეს და იმავე დღეს სახლში დააბრუნეს.

ბრალდებულები პოლიციამ 8 თებერვალს, დედოფლისწყაროს მუნიციპალიტეტში დააკავა.

დანაშაული 7-დან 10 წლამდე ვადით თავისუფლების აღკვეთას ითვალისწინებს.