აფხაზეთის დე ფაქტო პრეზიდენტმა რაულ ხაჯიმბა თანამდებობის დატოვებას არ აპირებს. ამის შესახებ რუსული მედია დე ფაქტო პარლამენტის წევრ ლეონიდ ჭამაღუაზე დაყრდნობით წერს. ხაჯიმბამ ამის შესახებ ოპოზიციის წარმომადგენლებისგან შემდგარ ხუთკაციან ჯგუფთან გამართულ შეხვედრაზე განაცხადა.

მანამდე ოკუპირებული აფხაზეთის დე ფაქტო პრეზიდენტმა რაულ ხაჯიმბამ მოსახლეობას სიმშვიდისკენ მოუწოდა.

2020 წლის 9 იანვარს სოხუმში, ოპოზიციის მომხრეებმა დე ფაქტო პრეზიდენტის ადმინისტრაციის შენობაში შეჭრა სცადეს. ე.წ. საპრეზიდენტო არჩევნების შედეგების ბათილად ცნობას მოითხოვეს.

ოკუპირებულ აფხაზეთში ე.წ. საპრეზიდენტო არჩევნები ორ ტურად ჩატარდა. მეორე ტურში მოქმედმა დე ფაქტო პრეზიდენტმა, რაულ ხაჯიმბამ გაიმარჯვა. მან ამომრჩეველთა ხმების 47.38% მიიღო, ალხას კვიცინიამ კი 46.19%.