რამდენიმე საათში საოკუპაციო რეჟიმი იმ ერთადერთ გამშვებ პუნქტსაც ჩაკეტავს, რომლითაც ახალგორის 4 თვიანი იზოლაციის შემდეგ, საქართველოს მოქალაქეები სარგებლობდნენ.

საოკუპაციო რეჟიმი 30 დეკემბრიდან სოფელ ქარძმანთან არსებული ერთადერთი გადასასვლელის დაკეტვას გეგმავს.

მორიგი პროვოკაციული გადაწყვეტილება, ისედაც ჰუმანიტარული კატასტროფის ზღვარზე მყოფ მოსახლეობას, დამატებით პრობლემებს უქმნის.

ადგილობრივები ყვებიან, რომ ოკუპანტების ქმედება, იმ ფონზე როდესაც ახალგორის ე.წ. გამშვები პუნქტი უკვე სამ თვეზე მეტია ჩაკეტილია, რეგიონში ჰუმანიტარული კრიზისის საფრთხეს აჩენს.

დე-ფაქტო ხელისუფლების მხრიდან დესტრუქციული ნაბიჯების გადადგმას ხელისუფლების უმოქმედობას უკავშირებს ოპოზიციის ნაწილი. ოპონენტების განცხადებით, ქვეყნის მთავრობის საერთაშორისო ასპარეზზე პასიურობა, კონფლიქტის ზონაში მაცხოვრებლებისა და სახელმწიფოს უსაფრთხოებას ყოველდღიურად აზარალებს.

ოკუპირებული ცხინვალის ე.წ. ხელისუფლება ოკუპირებულ რეგიონთან დამაკავშირებელი ერთადერთი გადასასვლელის 5 დღით ჩაკეტვას 30 დეკემბრიდან გეგმავს. მარიონეტული რეჟიმი ამ ფაქტს საახალწლოდ გამკაცრებული უსაფრთხოების ზომებით ხსნის.

საჩხერის რაიონის სოფელ სინაგურის კონტროლირებად ნაწილთან დამაკავშირებელი ე.წ. გამშვები პუნქტი სავარაუდოდ 3 იანვარს გაიხსნება. იმ ფონზე, როდესაც ახალგორთან დამაკავშირებელი გადასასვლელიც 116 დღეა დაკეტილია, ოკუპირებულ ტერიტორიაზე მცხოვრებ მოსახლეობას ახალი წლის გატარება სრულ ბლოკადაში მოუწევს.