(რეზონანსი) სასამართლომ ცოტნე გამსახურდიას საქმეზე ბრალდებულებს პატიმრობა შეუფარდა. ბრალდებულთა შორის ერთ-ერთი გამსახურდიას ბავშვობის მეგობარია. მკვლელობის მოტივად სიტყვიერი შელაპარაკება სახელდება.

როგორც შინაგან საქმეთა სამინისტროს მიერ გავრცელებულ განცხადებაშია ნათქვამი, განზრახ მკვლელობის მცდელობის ფაქტზე კვალიფიკაცია დაზუსტდა და დაკავებულთაგან 2 პირს: 1991 წელს დაბადებულ ტ.ღ.-ს და 1991 წელს დაბადებულ გ.ს.-ს ბრალდება დაუმძიმდათ. მათ ბრალი სისხლის სამართლის კოდექსის 19-109-ე მუხლის მეორე ნაწილის „ე" ქვეპუნქტით წარედგინათ, რაც დამამძიმებელ გარემოებაში ჯგუფურად ჩადენილ განზრახ მკვლელობის მცდელობას გულისხმობს. ხოლო, 3 პირს: 1990 წელს დაბადებულ თ.ქ.-ს 1982 წელს დაბადებულ პ.ყ.-ს და 1973 წელს დაბადებულ კ.ჩ.-ს ბრალი სსკ-ის 376-ე მუხლის მე-3 ნაწილით წარედგინათ, რაც განსაკუთრებით მძიმე დანაშაულის შეუტყობინებლობას გულისხმობს.