პანკისში მომხდარი მკვლელობა გახსნილია. პოლიციას ეჭვმიტანილების დასაკავებლად 3 დღე დასჭირდა. სამართალდამცველებმა 2 ახალგაზრდა დააკავეს. ისინი ნათესავები არიან.

ამ დრომდე უცნობი რჩება ოფიციალური ვერსია, რა გახდა მკვლელობის მოტივი.

შვილს უდანაშაულოდ მიიჩნევს პანკისში მომხდარ მკვლელობაში ბრალდებული არბი ქავთარაშვილის დედა. ლეილა გაურგაშვილი ამტკიცებს, რომ არბი ქავთარაშვილი მუთოშვილებთან სასაუბროდ ბიძას, მურად ქავთარაშვილს გაჰყვა და ვისო მუთაშვილის მკვლელობაში მონაწილეობა არ მიუღია.

სამი დღის წინ პანკისში, სოფელ საკობიანოსთან მომხდართან დაკავშირებით განსხავებული ვერსიები აქვთ მუთოშვილებისა და ქავთარაშვილების გვარების წარმომადგენლებს.

გარდაცვლილი ვისო მუთოშვილის ნათესავები დაპირისპირებას ჰესის მშენებლობას უკავშირებენ. მუთოშვილები გლოვის დასრულების შემდეგ დაპირისპირებულ გვართან ანგარიშსწორებას არ გამორიცხავენ.

შინაგან საქმეთა სამინისტრომ სისხლიან დაპირისპირებაში მონაწილეობისთვის ქავთარაშვილთან ერთად 29 წლის რამაზ ხანგოშვილიც დააკავა. ორივე მათგანს გამოძიება მკვლელობას და იარაღის უკანონო ტარებას ედავება.

სისხლიანი დაპირისპირება პანკისის ხეობაში 27 ნოემბერს მოხდა. ორმხრივი სროლის შედეგად 37 წლის ვისო მუთოშვილი გარდაიცვალა, ორი მამაკაცი კი მძიმედ დაიჭრა. საქმეს შინაგან საქმეთა სამინისტრო განზრახ მკვლელობის მუხლით იძიებს.