(რეზონანსი) „მთავარი არხის" ჟურნალისტი გიორგი გაბუნია პროკურატურაში დაიბარეს.

გაბუნია „რუსთავი 2-ის" კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის ფაქტზე მიმდინარე გამოძიების ფარგლებშია დაბარებული.

ამავე საქმეზე გუშინ, 4 ოქტომბერს პროკურატურაში გამოკითხვაზე იყვნენ რუსთავი 2-ის სხვა ყოფილი თანამშრომლებიც, გიორგი ლაფერაშვილი და ზაალ უდუმაშვილი. დღეს კი გამოკითხვაზე ნოდარ მელაძე დაიბარეს.

კიდევ უფრო ადრე, 2 ოქტომბერს თითქმის 9 საათის განმავლობაში იყო გამოკითხვაზე ფორმულას დირექტორი, ზუკა გუმბარიძე. ამავე საქმეზე ბრალი წაუყენეს მთავარი არხის დამფუძნებელსა და რუსთავი 2-ის ყოფილ გენერალურ დირექტორს, ნიკა გვარამიას.

საგამოძიებო უწყების ინფორმაციით, 2015 წლის საანგარიშო პერიოდში რუსთავი 2-ის მიერ მიღებულმა დეკლარირებულმა ზარალმა 7 377 230 ლარი შეადგინა, ამავე პერიოდში ინტერ მედია პლიუსის დეკლარირებულმა მოგებამ კი 8 690 664 ლარი.

On.ge