(რეზონანსი) გაოგნებულები ვართ მომხდარით და ვერ აგვიხსნია რა უნდა მომხდარიყო ძმებს შორის, - ამის შესახებ განცხადებას ზუგდიდში მომხდარ მკველობაზე, ოჯახის ახლობელი აკეთებს.

სოფელ ჯუმში ძმებ წურწუმიებს შორის მომხდარი კონფლიქტი მკვლელობით დასრულდა. 1983 წელს დაბადებულმა გიორგი (გოგა) წურწუმიამ საკუთარი ძმა, რობერტი დანით მოკლა, ამის შემდეგ ტრაგედიის ადგილი დატოვა და სოფელ ჯუმში, თავის საცხოვრებელ სახლში დაბრუნდა. მანქანა სახლის ეზოში დააყენა, თვითონ ქუჩაში გავიდა, სადაც სამართალდამცავებმა ოპერატიულად დააკავეს.

„გაოგნებულები ვართ მომხდარით და ვერ აგვიხსნია რა უნდა მომხდარიყო ძმებს შორის. ბრალდებული ძალიან კარგი პიროვნებაა, უკონფლიქტო, ბევრჯერ გვიქეიფია ერთად, ბევრჯერ ვყოფილვარ მის გვერდით, მაგრამ მას არასოდეს კონფლიქტი არავისთან არ მოსვლია. რა მოხდა არ ვიცით, გამოძიება დაადგენს ყველაფერს. ძმები გალიდან არიან, სამი ძმა და ერთი და ყავთ, ორი ძმა გერმანიაში ცხოვრობს წლებია და რობერტი სამი დღეა რაც გერმანიიდან ჩამოვიდა. გოგას სამი წლის წინ 7 თვის შვილი გარდაეცვალა და მას შემდედ ძალიან განიცდიდა მომხდარს, სულ შვილის საფლავზე ადიოდა, ის 7 თვეც სანამ ბავშვი ცოცხალი იყო სულ საავადმყოფოებში გაატარა. ამბობენ, გარდაცვლილზე რაღაც უთხრა ძმამ და მისმა სიტყვებმა ისე გაანაწყენა, რომ ეს მოხდაო.

რამდენად მართალია, არ ვიცი, ალბათ თავის ჩვენებაში იტყვის ყველაფერს. გოგას ნათესავები ზუგდიდში, დევნილების სახლში ცხოვრობენ. რობერტი დაოჯახებული არ იყო, დიდი ხანია გერმანიაში ცხოვრობს, რაზე იკამათეს ვერ დავადგინეთ ჯერ. ერთი დაღუპულია, მეორე დაკავებული. სასაფლაოზე ყოფილან და იქ მომხდარა მკვლელობა, ამის შემდეგ მოსულა გოგა სახლში, მანქანა გაუჩერებია, თვითონ გავიდა სახლიდან ფეხით და გზაზე პოლიცია შეხვედრია და დაუკავებიათ. ამბობენ, მარტო ძმები იყვნენო, ამიტომ ფაქტს თვითმხილველი არ ეყოლება. ყველანი შეწუხებულები ვართ. ვერ აგვიხსნია რამ მიიყვანა იგი იმ მდგომარეობამდე, რომ საკუთარი ძმა მოკლა. მე და გოგა ძმებივით ვიყავით, უკონფლიქტო ადამიანი იყო, კეთილი პიროვნებაა და ამიტომ არის უფრო შოკისმომგვრელი და წარმოუდგენელი, რამ გამოიყვანა წყობიდან, არ ვიცით", - ამბობს ახლობელი „კვირის პალიტრასთან".

გამოძიებით დადგინდა, რომ ბრალდებულმა 1985 წელს დაბადებულ ძმას, წარსულში არსებული უთანხმოების ნიადაგზე, ურთიერთშელაპარაკების შემდეგ ცივი იარაღით სხეულის დაზიანებები მიაყენა, მიღებული ჭრილობებით დაშავებული გარდაიცვალა. ძალოვანთა ინფორმაციით, დაკავებული ჩადენილ დანაშაულს აღიარებს.

კვირისპალიტრა