(რეზონანსი) თბილისი, ზემო ფონიჭალა, კორპუსი N 3ა... ადგილობრივები ამბობენ, რომ თითქმის წელიწადი არ გავა ისე, რომ კორპუსში მძიმე ტრაგედია არ დატრიალდეს.

ბოლო შემთხვევა გუშინ მოხდა... 14 წლის გოგო მე-7 სართულიდან გადმოვარდა. დაზიანებები სიცოცხლესთან შეუთავსებელი აღმოჩნდა. ის დღეს სამედიცინო დაწესებულებაში გარდაიცვალა.

მოზარდი გარკვეული პერიოდი ოჯახთან ერთად გერმანიაში ცხოვრობდა. ფაქტზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

გარდაცვლილი გოგონას დედა იყო ერთ-ერთი იმ მრავალრიცხოვან მოწმეებს შორის, რომელიც 2016 წელს ამავე კორპუსის გვერდით სადარბაზოში, ასევე მე-7 სართულზე მომხდარი საზარელი მკვლელობის საქმეზე გამოიკითხა. ოთარ მამფორიას ოჯახში წარმოუდგენელი ტრაგედია 2016 წლის 22 თებერვალს დატრიალდა. მისი 43 წლის მეუღლე ნონა რომანაძე და 3 წლის ქალიშვილი - მარიამ მამფორია სასტიკი მეთოდებით მოკლეს. მკვლელმა ნონა რამინაძეს ყელი გამოსჭრა და სხეულზე დანით 29 ჭრილობა მიაყენა, 3 წლის ბავშვს კი იგივე დანა 16-ჯერ ჩაარტყა, ხოლო ცხედარი დაწვა.

ამავე კორპუსში და ამავე ბინაში (მე-7 სართულზე) ტრაგიკულად გარდაიცვალა ოთარ მამფორიას პირველი მეუღლეც. შემთხვევა 2009 წლის 19 დეკემბერს, ნიკოლოზობის დღესასწაულზე მოხდა. 7 თვის ორსული ქალბატონი ახლობლებმა აბაზანაში გარდაცვლილი იპოვეს.

„გარდაცვალების მიზეზად ეპილეფსია დასახელდა, მაშინ ვერც ჩვილის გადარჩენა მოხერხდა", - გვიყვება ერთ-ერთი მეზობელი.

სიცოცხლე თვითმკვლელობით დაასრულა კორპუსის ერთ-ერთმა მაცხოვრებელმაც 2013 წელს. 50 წლამდე ქალბატონი ასევე მე-7 სართულიდან გადმოხტა. გამოძიება თვითმკვლელობამდე მიყვანის მუხლით დაიწყო, თუმცა უცნობი დარჩა, რამ, ან ვინ მიიყვანა შუახნის ქალი სუიციდურ მდგომარეობამდე.

პრაიმტაიმი