ოკუპირებულ აფხაზეთში ე.წ. საპრეზიდენტო არჩევნების მეორე ტურში რაულ ხაჯიმბა იმარჯვებს. ამის შესახებ დეფაქტო ცესკოს ხელმძღვანელმა თამაზ გოგიამ განაცხადა.

„წინასწარი მონაცემებით, ხმათა 47,38%-ით იმარჯვებს რაულ ხაჯიმბა. მისმა კონკურენტმა ალხას კვიცინიამ ხმათა 46,19% მიიღო. ორივე კანდიდატის წინააღმდეგ ხმა 3154 ადამიანმა მისცა. აქტივობამ 65,98% შეადგინა, რაც იმას ნიშნავს, რომ ხმის მიცემის უფლებით 83 880 ადამიანმა ისარგებლა“, - განაცხადა თამაზ გოგიამ.

„ეს ჩვენი ხალხის გამარჯვებაა. წინ ბევრი სამუშაო გველის. ერთიანობის პირობები უნდა შევქმნათ, ამის გარეშე სახელმწიფო ვერ შედგება. მთავარია არა ვინმეზე გამარჯვება, არამედ ქვეყნის განვითარება“, - განაცხადა რაულ ხაჯიმბამ. 

ალხას კვიცინიამ კონკურენტის გამარჯვებაზე საუბარს ნაადრევი უწოდა და განაცხადა, რომ ხმების ალტერნატიულ დათვლას აწარმოებს და ოფიციალურ შედეგებს გაასაჩივრებს, ვინაიდან „ვერც ერთმა კანდიდატმა ხმათა საჭირო რაოდენობა ვერ მოაგროვა“.