(რეზონანსი)არსებული ინფორმაციით, სახელმწიფო უსაფრთხოების სამსახურის ხელმძღვანელად გრიგოლ ლილუაშვილი დაინიშნება. „ინტერპრესნიუსის" ინფორმაციით, გრიგოლ ლილუაშვილის ახალ თანამდებობაზე უახლოეს დღეებში წარადგენენ. ლილუაშვილი სუს-ის უფროსის მოადგილის პოსტს იკავებდა.

შეგახსენებთ, რომ 2 სექტემბერს პრემიერ-მინისტრის თანამდებობა დატოვა მამუკა ბახტაძემ. მთავრობის ხელმძღვანელად შს მინისტრის გიორგი გახარიას კანდიდატურაა წარდგენილი. შს მინისტრად კი სუს-ის ამჟამინდელი ხელმძღვანელი ვახტანგ გომელაური ინიშნება.

სამთავრობო ცვლილებების ფარგლებში, თავდაცვის მინისტრად ირაკლი ღარიბაშვილი ინიშნება. ლევან იზორია კი უსაფრთხოების საბჭოს მდივანი იქნება, ასევე, არსებული ინფორმაციით, ის საგარეო დაზვერვის სამსახურს უხელმძღვანელებს.