პრემიერ-მინისტრობის კანდიდატის გიორგი გახარიას თქმით, ის მთავრობის შემადგენლობასა და პროგრამას პარლამენტში დღეს წარადგენს. „ქართული ოცნების“ ოფისში პოლიტსაბჭოს სხდომის დასრულების შემდეგ გამართულ ბრიფინგზე გახარიამ ბიძინა ივანიშვილს ნდობისთვის მადლობა გადაუხადა.
„დღეს, ამ გადაწყვეტილების შემდეგ, მე წარვადგენ მთავრობის შემადგენლობას და პროგრამას პარლამენტში და მინდა გითხრათ, რომ მთავრობის შემადგენლობაში იქნება მცირედი ცვლილებები. შინაგან საქმეთა მინისტრის პოსტს დაიკავებს ბატონი ვახტანგ გომელაური, ხოლო თავდაცვის მინისტრის პოსტს დაიკავებს ბატონი ირაკლი ღარიბაშვილი. ეს ცვლილებები გააძლიერებს მთავრობას და გააძლიერებს პოლიტიკურ გუნდს.
ბატონი ლევან იზორია დაიკავებს მაღალ თანამდებობას ჩვენს გუნდში, ის უხელმძღვანელებს უშიშროების საბჭოს. ეს არის ცვლილებები, რომელიც გააძლიერებს გუნდს და გახდის მას ეფექტურს, რაც ყველაზე მთავარია, დანარჩენი ყველაფერი, რაც შეეხება პროგრამას, შევხვდებით პარლამენტში და ვისაუბრებთ დეტალურად იქ“, – განაცხადა გახარიამ.