(რეზონანსი) „შენების მოძრაობის" ლიდერი დავით უსუფაშვილი შინაგან საქმეთა მინისტრის გიორგი გახარაის პრემიერ-მინისტრად დანიშვნის ვერსიას ეხმაურება და აცხადებს, რომ ბიძინა ივანიშვილი ამ გადაწყვეტილებით საკუთარ საპარლამენტო უმრავლესობას ულტიმატუმს უყენებს, ოპოზიციას კი ეთამაშება.
„ივანიშვილი საკუთარ საპარლამენტო უმრავლესობას ულტიმატუმს უყენებს - ან ისინი გახარიას მხარს დაუჭერენ და ამით ივანიშვილის თუნდაც ჩასაძირად განწირულ ნავს მიეჯაჭვებიან; ან ისინი გახარიას ჩააგდებენ და ამით პარლამენტს ვადამდე გამოეთხოვებიან.
ივანიშვილი, მისი აზრით, ოპონენტებსაც წაუგებელს ეთამაშება - ან გახარიას გაპრემიერებით პროცესების სუპერპოლარიზაციას შეუწყობს ხელს და სააკაშვილის აჩრდილს კიდევ ერთხელ დაამარცხებს; ან გახარიას ჩაგდებით ვადამდელ არჩევნებს გამოიწვევს და არსებული საარჩევნო სისტემის პირობებში ოპოზიციას გონს მოსვლას არ აცდის. ნიჭიერია ბიძინა, მაგრამ მხოლოდ სათავისოდ და არა საქვეყნოდ", - წერს დავით უსუფაშვილი ფეისბუქზე.
შეგახსენებთ, რამდენიმე დღეა მედიაში ვრცელდება ვერსია, რომ ბახტაძეს პრემიერ-მინისტრის პოსტზე გიორგი გახარია შეცვლის.