(რეზონანსი) ნინოწმინდის საკრებულოს დეპუტატი, ვრეჟ მურადიანი მის მიერ გადაღებულ ფეისბუქ-ლაივთან დაკავშირებით განმარტებას აკეთებს.
როგორც ნინოწმინდის საკრებულოს დეპუტატი „ქართული ოცნებიდან" ვრეჟ მურადიანი ამბობს, ლაივით ოთხი სოფლის მოსახლეობისთვის გზის მოწყობის სამუშაოების ჩვენება უნდოდა.
„დიდი ხანია დიდი და პატარა გონდურის, დილიფის და მამწარას მკვიდრები ამ გზის გაკეთებას ითხოვენ, ამიტომ გადავწყვიტე ლაივი ჩამერთო და მეჩვენებინა გზის გაწმენდითი სამუშაოები როგორ მიმდინარეობდა, შემდეგ კი ასფალტსაც დააგებენ", - ამბობს დეპუტატი „სამხრეთის კარიბჭესთან"
მურადიანი აცხადებს, რომ მას ლაივით მხოლოდ ორჯერ ისარგებლა: „სულ შემთხვევით, ჩართვის დროს თითი რაღაცაზე მომიხვდა, ინგლისურად ეწერა რაღაც, ვერც მივხვდი რა მოხდა, ჩემს შვილს დავურეკე. საერთოდაც მეგონა სხვა ვინმე რამეს მიკეთებდა და მითხრა ეტყობა ხელი მოგიხვდაო. შევრცხვი, მასწავლებელიც ვარ, ჩემი მოსწავლეები რას იფიქრებენ, ეს ხომ მართლა შემთხვევით დამემართა".
ნინოწმინდის საკრებულოს დეპუტატმა „ქართული ოცნებიდან", ვრეჟ მურადიანმა, ფეისბუქ-ლაივი ჩართო, რომელშიც აჩვენა, როგორ მიმდინარეობს გზის სარეაბილიტაციო სამუშაოები. თუმცა, ვიდეოს თანმდევი ეფექტების ფონზე, ყურადღებას სამუშაოებზე მეტად, თავად დეპუტატმა მიიქცია.