(რეზონანსი) Apple-მა თავისი ხმოვანი ასისტენტის Siri-ის ჩანაწერების მოსმენის გამო მომხმარებლებს ბოდიში მოუხადა. კომპანიამ ოფიციალური წერილი გამოაქვეყნა და კონფიდენციალობის პრაქტიკასთან დაკავშირებით ცვლილებები დააანონსა.

The Verge-ის ინფორმაციით, Apple-ი ხმოვანი ასისტენტის ჩანაწერების მოსასმენად ადამიანურ რესურსს იყენებდა და მათ სამუშაოს შესასრულებლად თანხას უხდიდა. როგორც კომპანიაში განმარტავენ, ამის მიზეზი Siri-ს მომსახურების გაუმჯობესება იყო.

Apple-ის განცხადებით, ისინი Siri-ის ჩანაწერებს აღარ შეინახავენ, მომხმარებლები თავად გადაწყვეტენ გამოიყენებს თუ არა ასისტენტი მათ ჩანაწერებს. თუ მომხმარებელი სურვილს გამოთქვამს Siri-ის გასაუმჯობესებლად მისი ხმოვანი ჩანაწერები გამოიყენონ, მაშინ ინფორმაციაზე წვდომა მხოლოდ Apple-ის თანამშრომლებს ექნებათ.

The Guardian-ის ინფორმაციით, Apple-ი ხმოვანი ასისტენტის ჩანაწერების მოსასმენად კონტრაქტორებს ქირაობდა. მათ კი ისეთ ინფორმაციაზე ჰქონდათ წვდომა, რომელიც ხშირად პირადი ცხოვრების დეტალებს შეიცავდა. ცნობილია, რომ კონტრაქტორები დღეში 1,000-მდე ჩანაწერს უსმენდნენ.