(რეზონანსი) კანარის კუნძულებზე ტყე იწვის. „როიტერის" ინფორმაციით, ხანძარი ტყის მასას კუნძულ გრან კანარიაზე გაუჩნდა. ხანძარმა უკვე 900 ჰექტარი ტყის ფართობი გაანადგურა. სტიქიის ზონის მახლობლად მდებარე პატარა ქალაქებიდან: არტენარადან, ტეხედადან და გალდარიდან 1000-ზე მეტი ადამიანის ევაკუაცია განხორციელდა.

ხანძარი, რომელიც ქალაქ ლას პალმასიდან 30 კილომეტრში მძვინვარებს, დამსვენებლებისთვის პოპულარული ეროვნული პარკისკენ ვრცელდება. ცეცხლის ჩასაქრობად ხელისუფლება თვითმფრინავებს და ვერტმფრენებს იყენებს. პოლიცია აცხადებს, რომ ხანძარი სავარაუდოდ ერთ-ერთი ადგილობრივი მცხოვრების მიერ მეტალების შესადუღებელი ელექტრომოწყობილობის გამოყენების გამო გაჩნდა.

„ევრონიუსი" წერს, რომ სამართალდამცველებმა 55 წლის მამაკაცი დააკავეს.