(რეზონანსი) ამ წუთებში ზვიად კუპრავას სასამართლო პროცესი მიდინარეობს. სასამართლომ ჯერ მხარეთა რეპლიკები უნდა მოისმონოს, შემდეგ საბოლოო სიტყვა, რის შემდეგაც სასამართლო გადაწყვეტილების მისაღებად გავა.

„რეფორმირების ცენტრის" დამფუძნებელი სასამართლოს სასადილოში მომხდარ ინციდენტთან დაკავშირებით არის დაკავებული.

გამოძიების ინფორმაციით, 2018 წლის 11 ივნისს ზვიად კუპრავამ სასამართლოს შენობაში სიტყვიერი შეურაცხყოფა მიაყენა მოსამართლეს, რისთვისაც მას ბრალი წარედგინა სისხლის სამართლის კოდექსის 366-ე მუხლით (სასამართლოს უპატივცემულობა). კუპრავას აღკვეთის ღონისძიების სახით გირაო შეეფარდა იმ მიზნით, რომ თავიდან ყოფილიყო აცილებული ბრალდებულის მხრიდან ახალი დანაშაულის ჩადენა.

ამის შემდეგ, გამოძიების ცნობით, გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატ ირაკლი ზაქარეიშვილს.

აღნიშნული ქმედებისთვის ზვიად კუპრავას სისხლის სამართლის კოდექსის 126-ე მუხლით (ძალადობა) ბრალი დაუსწრებლად წარედგინა, ვინაიდან მან თავი აარიდა სამართალდამცავ ორგანოში გამოცხადებას. გირაოს პირობების დარღვევის - ახალი დანაშაულის შესაძლო ჩადენის, სამართალდამცავ ორგანოში არგამოცხადების, მართლმსაჯულებისთვის თავის არიდების - გამო, სასამართლოს გადაწყვეტილებით მიმდინარე წლის 21 თებერვალს ზვიად კუპრავას გირაო პატიმრობით შეეცვალა.