მამუკა ხაზარაძემ და ბადრი ჯაფარიძემ "თიბისი ბანკის" სამეთვალყურეო საბჭოში თანამდებობები დატოვეს.

ამის მიზეზად ის ასახელებს, ხელისუფლების მხრიდან "უსამართლო თავდასხმებს, რის გამოც ბანკი და მისი აქციონერები ზარალდებიან".

ხაზარაძე აცხადებს, რომ ისინი ტოვებენ თანამდებობას მანამ, სანამ "ეს აბსურდული" პროცესი არ დასრულდება.

"როგორც იცით დღეს პროკურატურის ბრიფინგმა საბჭოთა ტრადიციების შესაბამისად უკვე მესამედ, ბოლო 6 თვის განმალობაში მძიმე შედეგი მიაყენა "თიბისი ბანკის" აქციების ფასს, როგორც იანვარ-თებერვალში დღესაც მისი ფასი დაახლოებით 12%-ით გაუფასურდა დღის განმავლობაში. შედეგად ბანკის აქციონერებმა დღეს 130 მლნ დოლარით იზარალეს. წინა ორ ბრიფინგსაც იგივე შედეგები ჰქონდა.

ეს არის მიზანმიმართული ქმედება საერთაშორისო ინვესტორების და ჩვენი ქვეყნის ფინანსური სტაბილურობის წინააღმდეგ. 

აქვე მინდა შეგახსენოთ, რომ 24 ივნისს ლონდონში ჩვენმა აქციონერებმა მე და ბადრი 98% ხმათა რაოდენობით თავიდან აგვირჩიეს ბანკის თავჯდომარედ და მის მოადგილედ, რისთვისაც მადლობას ვუხდით თითოეულ მათგანს ასეთი ნდობისათვის. თუმცა იქიდან გამომდინარე, რომ არ დასრულდა უსამართლო თავდასხმები ჩვენზე და ამის გამო ზარალდებიან ბანკი, მისი აქციონერები და თანამშრომლები. ამიტომ ვტოვებთ ბანკში დაკავებულ თანამდებობებს მანამ სანამ არ დასრულდება ეს აბსურდული პროცესი!" - წერს მამუკა ხაზარაძე.