(რეზონანსი) სვეტიცხოვლის ტაძრის დეკანოზი - მამა პეტრე კოლხი ფეისბუქზე შემდეგი სახის სტატუსს აქვეყნებს:

"არც ერთი ჭკუათმყოფელი არ მოიწონებს ცოდვის და უზნეობის დემონსტრირებას. ამას არ სჭირდება დიდი რელიგიური გრძნობები. არის რაღაც თემები, რომელიც შენთვის უნდა გქონდეს და სააშკარაოზე არ გამოიტანო. მითუმეტეს არც სხვა უნდა აიძულო, რომ შენი მიდგომები და დამოკიდებულებები მიიღონ, ან გაიზიარონ. ესეც გარკვეული ტიპის ძალადობაა, მაგრამ ადამიანების განსხვავებულობის გამო აგრესიული გამოსვლები, მუქარები, მრისხანე შეძახილები სულაც არ ნიშნავს სარწმუნოების დაცვას.

თუ ერთი მხარე ცდება, მეორეც არანაკლებ ცდება და საბოლოოდ ნაპრალი უფრო გაიზრდება. შერიგების და სიმშვიდის შენარჩუნების ნაცვლად, საზოგადოებას ნაწილებად ვყოფთ და ყველაზე მთავარი, ამ არეულობით კონკრეტული კლანი სადაცაა გამოჩეკავს ფსევდოლიდერს, რომელსაც უსაფუძვლო პრეტენზია გაუჩნდება სამომავლოდ ხელისუფლებაში მოსვლაზე იფიქროს. ეს კი საბოლოოდ დააზარალებს როგორც ეკლესიას, ისე სახელწმიფოს.

ნურც ფანატიკოსები და ნურც ლიბერალები მათდაუნებურად ნუ მოექცევიან ასეთი მზაკვრული თამაშის გავლენის ქვეშ. მერე კი ყველას ერთ მხარეს მოუწევს უთანასწორო ბრძოლა, რაც არ უნდა დავუშვათ!", - წერს პეტრე კოლხი ფეისბუქზე.