პროკურატურამ აჭარაში მოქმედი და ყოფილი თანამდებობის პირები დააკავა. დაპატიმრებულთა შორის არიან ბათუმის ყოფილი მერი გიორგი ერმაკოვი, განათლების მინისტრის მოვალეობის შემსრულებელი ბაგრატ მანველიძე და ბათუმის ვიცე მერი თენგიზ პატარიძე.
საუბარია კორუფციულ გარიგებაზე, რომლის შედეგადაც სახელმწიფომ მილიონ სამასი ათას ლარზე მეტი იზარალა.
საქმე ეხება პროექტ „იაფი სახლის" განხორციელებას. პროკურატურის ცნობით, ბათუმის მერიის მაშინდელმა მაღალჩინოსნებმა ტენდერში ერთ-ერთ უცხოურ კომპანიას უკანონოდ გაამარჯვებინეს. ამ კომპანიას ავანსი ჩაერიცხა, თუმცა არაფერი აშენებულა.
აჭარაში, საქართველოს პროკურატურის და ფინანსთა სამინისტროს საგამოძიებო სამსახურის ერთობლივი მუშაობის შედეგად, სამსახურეობრივი მდგომარეობის გამოყენებით, დიდი ოდენობით სახელმწიფოს კუთვნილი ფულადი თანხის მართლსაწინააღმდეგო გაფლანგვის და სამსახურებრივი მდგომარეობის ბოროტად გამოყენების ფაქტებზე 7 მაღალჩინოსანი დააკავეს.