მეტროსადგურში მოქალაქეების შემოწმებასთან დაკავშირებით გავრცელებულ ინფორმაციაზე შინაგან საქმეთა სამინისტრო განმარტებას აკეთებს. როგორც უწყებაში აცხადებენ შემოწმება პრევენციული ღონისძიებების ფარგლებში ხორციელდება:

„მომხდარ დანაშაულზე რეაგირების გარდა შინაგან საქმეთა სამინისტროს ერთ-ერთი მთავარი ფუნქციაა დანაშაულის პრევენცია. ამ მიზნით, პოლიცია უფლებამოსილია „პოლიციის შესახებ კანონის" საფუძველზე, შეაჩეროს და შეამოწმოს პირი თუ არსებობს საკმარისი საფუძველი ვარაუდისთვის, რომ ამ პირს თან აქვს ამავე კანონით აკრძალული რაიმე ნივთი. სწორედ აღნიშნულ, კანონით გათვალისწინებულ პრევენციულ ღონისძიებებს ახორციელებს პოლიცია პერიოდულად."- განუცხადეს „ნიუპოსტს" უწყებაში.