(რეზონანსი) თბილისში, პეკინის გამზირზე მიკროსაფინანსო ორგანიზაცია "გირო კრედიტი" დააყაჩაღეს. თვითმხილველების თქმით, თავდამსხმელებს ნიღბები ეკეთათ და ადგილზე სროლაც განახორციელეს.

შინაგან საქმეთა სამინისტროს ინფორმაციით, დაკავებულები მამა-შვილი 30 წლის გუჯა შაიშმელაშვილი და 54 წლის გოჩა შაიშმელაშვილი არიან.

მამა-შვილი წარსულში სხვადასხვა დანაშაულისთვის არიან ნასამართლევი.

მომხდარზე გამოძიება ჯგუფურად ჩადენილი ყაჩაღობის და ცეცხლსასროლი იარაღის მართლსაწინააღმდეგო შეძენა-ტარების ფაქტებზე, საქართველოს სისხლის სამართლის კოდექსის 179-ე მუხლის მე-2 ნაწილის "ბ" ქვეპუნქტით და 236-ე მუხლის მე-3 და მე-4 ნაწილებით მიმდინარეობს.