პრეზიდენტის ადმინისტრაციიდან რეორგანიზაციის შედეგად გათავისუფლებული 63 თანამშრომლიდან სხვა საჯარო სამსახურებში ვერც ერთი ვერ დასაქმდა. პრეზიდენტის პრესსპიკერმა ხატია მოისწრაფიშვილის თქმით,  პროცესი ოფიციალურად 15 მარტს დასრულდება.

"ეს ეტაპი დასრულდება 15 მარტს. 63 ადამიანია მობილობის სქემაში ჩართული. საჯარო ბიურომ გამოგვიგზავნა სხვადასხვა უწყებებში არსებული 277 ვაკანსია. ჩვენ მივწერეთ 29 საჯარო უწყებას, სადაც იყო ვაკანსიები. აქედან მხოლოდ 12-მა გვიპასუხა და გვითხრა, რომ არ აქვთ შესაძლებლობა დაასაქმონ კადრები. დანარჩენებმა არ გვიპასუხეს. შესაბამისად, მათგანაც ჩაითვალა უარი ანუ გამოდის, რომ 63-ვე გათავისუფლებული თანამშრომელი აიღებს კომპენსაციას 3 თვის ხელფასის ოდენობით", - განუცხადა "აიპიენს" მოისწრაფიშვილმა.

რაც შეეხება ინფორმაციას, თუ რა თანხა ექნება გადასახდელი პრეზიდენტის ადმინისტრაციას 63 თანამშრომლისთვის კომპენსაციის სახით, ეს ინფორმაცია საჯარო 15 მარტის შემდეგ გახდება.