გამოძიებით დადგინდა, რომ შეიარაღებული და ნიღბიანი ბრალდებულები გლდანში „საქართველოს ბანკში“ შეიჭრნენ და სიცოცხლის მოსპობის მუქარით ფული მოითხოვეს. ბანკის თანამშრომლებმა განგაშის სიგნალით დაცვის პოლიცია გამოიძახეს. ბანკის ფილიალთან მისულ დაცვის პოლიციას თავდამსხმელებმა ცეცხლი გაუხსნეს.

ბრალდებულებმა, ბანკის ფილიალზე ყაჩაღურ თავდასხმამდე, მძევლად აიყვანეს 2 მოქალაქე და ჩამოართვეს კუთვნილი ავტომანქანა. მოგვიანებით დამყაჩაღებლები იძულებული გახდნენ მძევლად აყვანილი ორივე მოქალაქე გაეთავისუფლებინათ და შემთხვევის ადგილიდან გატაცებული ავტომანქანით მიიმალნენ.

პოლიციამ ჩატარებული საგამოძიებო მოქმედებების შედეგად გატაცებული ავტომანქანას მიაგნო, რომელიც ბრალდებულებმა კვალის დაფარვის მიზნით დაწვეს.

დაკავებულია 2 პირი - წარსულში ნასამართლევი და ამჟამად პირობითი მსჯავრის ქვეშ მყოფი 1998 წელს დაბადებული ნ.ქ. და ასევე, წარსულში ნასამართლევი, 1999 წელს დაბადებული კ.გ. დანაშაული 7-დან 10 წლამდე თავისუფლების აღკვეთას ითვალისწინებს.