(რეზონანსი) შინაგან საქმეთა სამინისტროს ინფორმაციით, დღეს თბილისში, თამარაშვილის ქუჩაზე ორი პირი დაჭრეს. ისინი საავადმყოფოში არიან გადაყვანილი.

„შინაგან საქმეთა სამინისტრომ თბილისში, თამარაშვილის ქუჩაზე მომხდარ დაჭრის ფაქტთან დაკავშირებით გამოძიება სისხლის სამართლის კოდექსის 19-109-ე და 236-ე მუხლებით დაიწყო, რაც დამამძიმებელ გარემოებებში განზრახ მკვლელობის მცდელობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

შემთხვევის შედეგად დაჭრილია ორი ადამიანი. ორივე მათგანი გადაყვანილია სტაციონარში. ფაქტთან დაკავშირებით სამართალდამცველები საგამოძიებო მოქმედებებს ატარებენ", - განუცხადეს პირველ არხს შსს-ში.

თავდაპირველად ცნობები ერთ დაჭრილზე ვრცელდებოდა. არსებული ინფორმაციით, დაჭრას წინ შელაპარაკება უძღოდა. თვითმხილველები ამბობენ, რომ მათ 10-მდე სროლის ხმა გაიგონეს.

თამარაშვილის ქუჩაზე ექსპერტ-კრიმინალისტები ამ დრომდე მუშაობენ.