(რეზონანსი) ვალუტის გადამცვლელი პუნქტის დაყაჩაღების მცდელობა ქუთაისში - ჯიხურის მეპატრონეს თავს ერთი პირი დაესხა, რომელსაც მოტოციკლისტის ჩაფხუტი ეფარა.

თავდამსხმელმა ფულის წართმევა სცადა, თუმცა, ჯიხურის მეპატრონემ და მისმა შვილმა წინააღმდეგობა გაუწიეს.

პოლიციამ ბრალდებული გაქცევის მცდელობის დროს დააკავა. შსს-ს ინფორმაციით, დაკავებული ამჟამად ნარკოდანაშაულისთვის პირობითი მსჯავრის ქვეშ იმყოფება.

„1988 წელს დაბადებული, ამჟამად ნარკოდანაშაულისთვის პირობითი მსჯავრის ქვეშ მყოფი ბ.შ. პოლიციამ იმ დროს დააკავა, როდესაც იგი ქუთაისში, ჭავჭავაძის ქუჩაზე, ვალუტის გადამცვლელ ერთ-ერთ ჯიხურს თავს დაესხა და მეპატრონეს ავტომატური ცეცხლსასროლი იარაღის მუქარით თანხას სთხოვდა. აღნიშნულ ფაქტს შეესწრნენ დაცვის პოლიციის ინკასაციის სამმართველოს თანამშრომლები, რომლებმაც ბ.შ., კრიმინალური პოლიციის თანამშრომლებთან ერთად, შემთხვევის ადგილზე დააკავეს. სამართალდამცველებმა დანაშაულის ჩადენის იარაღი: ავტომატი და პისტოლეტი შემთხვევის ადგილიდან ნივთმტკიცებად ამოიღეს" - აცხადებენ შსს-ში.

გამოძიება ყაჩაღობის და ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტზე, საქართველოს სისხლის სამართლის კოდექსის 179-ე და 236-ე მუხლებით მიმდინარეობს.

დანაშაული 6-დან 9 წლამდე ვადით თავისუფლების აღკვეთს ითვალისწინებს.