ე.წ. შავ სიაში მყოფი მოქალაქეთა ნაწილის მტკიცებით, სესხის განულებაზე უარს ეუბნებიან. მოქალაქეების ინფორმაციით, „სესხების განულება ეკუთვნით და ყველა კრიტერიუმს აკმაყოფილებენ“.

„პირადად მე რამდენიმე კომპანიის ვალი მაქვს. ესენია: შპს „პრობლემური აქტივების ბიურო“ და შპს „ფინანსური სექტორი“. ვაკმაყოფილებ ყველა კრიტერიუმს, რომელიც მთავრობამ განსაზღვრა, თუმცა კომპანიები მეუბნებიან, რომ თავად წყვეტენ, ვის სიას გადასცემენ და ვისას – არა. როგორც ჩანს, ეს კომპანიები ყველა სესხს არ გაანულებენ“, - განუცხადა „ინტერპრესნიუსს“ ერთ-ერთმა მოქალაქემ.

აღსანიშნავია, რომ სოციალურ ქსელ „ფეისბუქში“ რამდენიმე თემატური ჯგუფიცაა შექმნილი, მაგალითად „სესხები არ განულდა“ და „არა ონლაინ სესხებს“, სადაც წერენ, რომ სესხების განულების პრობლემა მათაც აქვთ.

პრემიერ-მინისტრის მამუკა ბახტაძის განცხადებით, 600.000 მოქალაქეს, რომლებიც იმყოფებიან ე.წ. შავ სიაში, 1 წელზე მეტხანს არ შეუტანია თანხა და ვალის ძირი არ აღემატება 2000 ლარს მიკროსაფინანსოებსა და ბანკებში ვალები 31 დეკემბრამდე გაუნულდებათ.