თურქეთში, მაღალსიჩქარიანი სამგზავრო მატარებელი, რომელიც ანკარიდან ქალაქ კონიის მიმართულებით მოძრაობდა, რელსებიდან გადავიდა. შემთხვევის შედეგად ოთხი ადამიანი დაიღუპა და 40-ზე მეტი დაშავდა.

თურქეთის ტრანსპორტის სამინისტროს ცნობით, მაღალსიჩქარიანი მატარებელი  ესტაკადას შეეჯახა. უბედური შემთხვევა მოძრაობის დაწყებიდან ოთხი წუთის შემდეგ მოხდა, როდესაც მან 80-90 კმ/სთ სიჩქარე განავითარა.

შემთხვევის მიზეზები ჯერჯერობით უცნობია. ინციდენტის ადგილზე სამაშველო სამსახურები და ექიმები მუშაობას განაგრძობენ.

შემთხვევის შედეგად ქართველები არ დაშავებულან. როგორც “აიპრესს” საქართველოს საგარეო საქმეთა სამინისტროს საზოგადოებასთან ურთიერთობის სამსახურში განუცხადეს, ჯერჯერობით საელჩოში საქართველოს მოქალაქეების  შესახებ ინფორმაცია არ შესულა.