პარლამენტის აგრარული კომიტეტის თავმჯდომარის ოთარ დანელიას ინფორმაციით, ორშაბათს უცხო ქვეყნის მოქალაქეზე არც ერთი რეგისტრაცია არ მომხდარა.
„ეს არის ბოლო ინფორმაცია, რაც იუსტიციის მინისტრისგან მაქვს. რეალურად, ოთხი სამუშაო დღეა დარჩენილი და მჯერა, რომ ამ დღეების განმავლობაში ვერც ერთი არასასურველი ტრანზაქცია ვერ მოხდება. მოგეხსენებათ, მიწის ყიდვისთვის ძალიან ბევრი დოკუმენტაციაა საჭირო. ის სრულ თანხვედრაში უნდა იყოს ჩვენს კანონმდებლობასთან და განაცხადები ძალიან ხშირად ხარვეზდება ხოლმე“, – განაცხადა დანელიამ.
მისი თქმით, განაცხადების დაკმაყოფილება ოთხ სამუშაო დღეში ფიზიკურად ვერ მოესწრება, შემდეგ კი, დასვენების დღეებია და პლუს, პრეზიდენტის ინაუგურაცია, ხოლო 16 დეკემბრიდან ძალაში შედის ახალი კონსტიტუცია, რომელიც უცხო ქვეყნის მოქალაქეებისთვის მიწების მიყიდვის აკრძალვას ისედაც ითვალისწინებს.