(რეზონანსი) ამერიკაში მცხოვრები ახალგაზრდა ქართველი მსახიობი - ირინკა კავსაძე სატელევიზიო პროექტ "ცეკვავენ ვარსკვლავებში" თავის ნომერს, მოცეკვავე ოთო ფოლადაშვილთან ერთად, ყოველთვის ეფექტურად, დახვეწილად ასრულებს. ირინკას ბაბუა - კახი კავსაძე შვილიშვილის სასცენო გამოსვლას ყოველთვის ესწრება, თუმცა მისთვის კომპლიმენტი ერთხელაც არ უთქვამს.
"ძალიან ნერვიულობს იმის გამო, რომ არ უნდა, მე ვინერვიულო და სულ მეუბნება, - ახლა საქმეს წყნარად, მშვიდად შეუდექიო, მაგრამ კახიმ კომპლიმენტები არ იცის. საერთოდ, კომპლიმენტების თქმა არ უყვარს და არც ჩემთვის უთქვამს, არც - მამაჩემისთვის, არც მამიდაჩემისთვის... ყოველთვის ძალიან ნეიტრალურ პოზიციაზეა.
"ცეკვავენ ვარსკვლავების" "ლაივებსაც" ყოველთვის ესწრება, მაგრამ არც კრიტიკულად მაფასებს, არც კომპლიმენტს მეუბნება. ქართული ცეკვის შესრულების შემდეგ, უბრალოდ, მკითხა: - მუხლები არ გტკივაო? "იმის იქით" არაფერი უთქვამს," - განაცხადა ირინკა კავსაძემ "კვირის პალიტრასთან".