ამერიკელი მკვლევარი, ლინკოლნ მიტჩელი არჩევნების შედეგებზე, ოპოზიციის პროტესტსა და ამ პროცესში მიხეილ სააკაშვილის როლზე საუბრობს:
"გაერთიანებული ოპოზიციის გადაწყვეტილება, არ ცნოს არჩევნების შედეგები, გასაკვირი არ არის - ისინი საარჩევნო პროცესის დროს აცხადებდნენ, რომ დამარცხების შემთხვევაში სწორედ ასე მოიქცეოდნენ. იმედია, აქციები მშვიდობიანი იქნება, თუმცა ვეჭვობ, მასშტაბური იყოს, რადგან ქართველების უმრავლესობამ იცის, რომ სალომე ზურაბიშვილი რეალურად გამარჯვებულია.
გრიგოლ ვაშაძის დამარცხებაში სააკაშვილის როლი უმთავრესია. ნაციონალური მოძრაობისთვის ის თავსატეხია, თუმცა მისი მხარდამჭერების წყალობით "ნაცმოძრაობა" ქვეყანაში კვლავ მეორე მსხვილ პოლიტიკურ ძალად რჩება.
სააკაშვილთან ასოცირება ზღუდავს "ნაციონალების" შესაძლებლობას, რადგან საზოგადოების უმრავლესობა სააკაშვილის ხელისუფლებაში დაბრუნებას მძიმე ფაქტად მიიჩნევს. სააკაშვილი რომ კარგი სტრატეგი იყოს და სურდეს "ქართული ოცნების" მოშორება, ერთი წელი მაინც გაჩუმდებოდა და მესამე ძალის გამოჩენას შეუწყობდა ხელს, თუმცა მისი მცდარი რწმენა, რომ საქართველოს ხელისუფლებაში დაბრუნდება, ამას შეუძლებელს ხდის", - ამბობს "კვირის პალიტრასთან" მიტჩელი.