(რეზონანსი) პუტინისთვის გაგზავნილი წერილის გამო, რომელშიც 14 წლის გოგონა დედის დაბალ ანაზღაურებაზე წერდა პრეზიდენტს, ქალაქის ადმინისტრაციამ მოზარდი თვითმკვლელობამდე მიიყვანა. შემთხვევა 19 ნოემბერს რუსეთში, სმოლენსკის ოლქის ქალაქ საფონოვოში მოხდა.14 წლის ნატაშამ, რომლის დედაც საფონოვოს საავადმყოფოში სანიტრად მუშაობს, რუსეთის პრეზიდენტს წერილი გაუგზავნა, სადაც წერდა, რომ დედამისს ძალიან ცოტას უხდიან, თავად კი ჯანმრთელობის, კერძოდ, მხედველობის პრობლემები აქვს და მკურნალობაში დახმარება სთხოვა ქვეყნის ლიდერს...
როგორც რუსული გამოცემები სმოლენსკის ადგილობრივ მედიაზე დაყრდნობით წერენ, წერილის შემდეგ, გოგონას დედა საავადმყოფოს ხელმძღვანელობამ დაიბარა და "შვილის თავხედური საქციელის გამო" მკაცრი საყვედური უთხრა.
"სახლში დაბრუნებული დედა, შვილს ფიზიკურად გაუსწორდა, რამაც მოზარდის შინაგანი მდგომარეობა კიდე უფრო დაამძიმა..." - წერს ადგილობრივი გამოცემა smolnarod.ru.
ნატაშა რუსეთის პრეზიდენტს დედის ხელფასის გარდა, მის სკოლაში არსებულ სიტუაციაზე, მასწავლებლებზეც წერდა. ასევე, იმაზეც, რომ მას თავისი პრობლემების, ცუდი მხედველობის გამო, კლასელები სიცოცხლეს უწამლავდნენ - დასცინოდნენ და "ციკლოპს" ეძახდნენ. ის კი, თანხების უქონლობის გამო, მკურნალობას ვერ ახერხებდა.როგორც ჩანს, მასზე ძალადობა წლების განმავლობაში გრძელდებოდა, რადგან ჯერ კიდევ 2015 წელს, გოგონა სოციალური ქსელის თავის კედელზე წერდა, რომ მარტოსული იყო.
"რატომ ხართ ყველანი ასეთი სასტიკები?!"; "ყოველდღე ვეკითხები ჩემს თავს - ვინმეს ვჭირდები, ოდნავ მაინც ვინმესთვის რამეს წარმოვადგენ?! ნურავის დაადანაშაულებთ ჩემს სიკვდილში, ეს მე თავად გადავწყვიტე..." - წერდა მოზარდი, თუმცა, ადგილობრივი მედიის ცნობით, მისთვის ყურადღება არავის მიუქცევია.
19 ნოემბერს გოგონა სადარბაზოში ჩამომხვრჩალი იპოვნეს... მას თან ჰქონდა წერილი, სადაც წერდა, რომ ის არავის ჭირდება და მის სიცოცხლეს აზრი არ აქვს.
მომხდარ ფაქტს მწვავედ აკრიტიკებენ ადგილობრივი უფლებადამცველები. ისინი როგორც საავადმყოფოს, ასევე სკოლის ადმინისტრაციას და ხელმძღვანელობას, მთლიანად ქვეყანაში ადამიანის უფლებების კუთხით არსებულ ვითარებას, სამარცხვინოს უწოდებენ.
"Ambebi.ge"