ბორჯომში ავტოსაგზაო შემთხვევის დროს ერთმანეთს ტრაილერი და „მერსედესის“ მარკის მსუბუქი ავტომობილი შეეჯახნენ. დარტყმა იმდენად ძლიერი იყო, რომ სატვირთო ავტომობილი გადაბრუნდა. საბედნიეროდ, ავარიას მსხვერპლი არ მოჰყოლია. ორი დაშავებული სასწრაფო დახმარების ბრიგადამ ბორჯომის სამედიცინო დაწესებულებაში გადაიყვანა.

ავტოსაგზაო შემთხვევა ბორჯომის შესასვლელში დაახლოებით 18:00 საათზე მოხდა. ავარიის დროს „მერსედესში“ მსხდომი ორი 1994 წელს დაბადებული ახალგაზრდა დაშავდა.

როგორც სამედიცინო დაწესებულებაში აცხადებენ, ერთს ბარძაყის ძვალი აქვს მოტეხილი, მეორეს მხოლოდ დაჟეჟილობები აღენიშნება.

ექიმის განმარტებით, ორივე მათგანს გამოკვლევები უტარდება და მათი მდგომარეობა დამაკმაყოფილებელია.