(რეზონანსი) 15 ნოემბერს თბილისში ტრაგედია მოხდა. ზემო ფონიჭალაში, ერთ-ერთ კორპუსში, სავარაუდოდ, ბუნებრივი აირი აფეთქდა. უბედურ შემთხვევას ემსხვერპლა ახალგაზრდა ქალი და ჩვილი. მაშველებმა დედა-შვილი რამდენიმე საათიანი ძებნის შედეგად ნანგრევების ქვეშ იპოვნეს.

აფეთქების შედეგად დაშავდა ერთი ოჯახის სამი წევრი. დამწვრობის ცენტრის რეანიმაციულ განყოფილებაში იმყოფებიან: 44 წლის მამაკაცი, მისი 24 წლის შვილი და 6 წლის შვილიშვილი.

მეხანძრე-მაშველები, რომლებიც ადგილზე მუშაობდნენ, ტრაგიკულ შემთხვევას იხსენებენ:

„შემთხვევის ადგილზე მისვლის დროს დაგვხვდა ძალიან საშინელი სურათი".

„ადგილზე მისვლისთანავე, სახანძრო-სამაშველო ჯგუფების მიერ მოხდა დაშავებულების ევაკუაცია, სახანძროს კიბის გამოყენებით პარალელურ რეჟიმში სადარბაზოდან მიმდინარეობდა მოქალაქეების ევაკუაცია, მოქალაქეების უსაფრთხო ადგილზე გადაყვანა"

„მეორე სართულზე თვითმხილველების ინფორმაციით, ნანგრევებში მოყოლილი იყო 2 ადამიანი, დედა და შვილი"

„ბევრ საგანგებო-სამაშველო სიტუაციაში მიმიღია მონაწილეობა, მაგრამ ასეთი მძიმე და რთული გამოძახება ემოციურად ჩემთვის არ ყოფილა"

„ძალიან დიდი განცდა გამოიწვია ჩვენში , რომ ნანგრევებში მოყოლილი იყო 1 წლის ბავშვი"

"ყველა მეხანძრე-მაშველი, ვინც იქ ვმუშაობდით, ორიენტირებულები ვიყავით, დროულად მოხერხებულიყო მათი ნანგრევებიდან გათავისუფლება. დაახლოებით 5-6 საათის მუშაობის შემდეგ შევძლელით და ჯერ ქალბატონის, შემდეგ კი ბავშვის ცხედარი გამოვიყვანეთ"

"ადგილზე საათების განმავლობაში ვმუშაობდით, ვამტვრევდით რკინა-ბეტონს, მაგრამ ვერ ჩავდიოდით ბავშვამდე. აქედან გამომდინარე ეს ძალიან რთული იყო, რომელიც მთელი ცხოვრება მემახსოვრება";

„როდესაც მეხანძრე მაშველი ხდები და ფორმას იცვამ, გარკვეულწლიად ემოციების შეკავების უნარები გამოუმუშავდება ხოლმე, რადგან ეს სიტუაცია კონკრეტულად 1 წლის ბავშვს ეხებოდა, ამიტომ ვამბობ, რომ იყო ძალიან რთული"

„ისეთი მომენტი იყო, სისხლი რომ გაგეყინება ადამიანს, რადგან თითოეულ ჩვენთაგანს შვილები გვყავს, წარმოგვიდგენია, როგორი იქნება იმ ადამიანის მდგომარეობა, ვისაც შვილი დაეღუპება".