(რეზონანსი) 9 აპრილის დარბევისას მოკლული 16 წლის ეკა ბეჟანიშვილის დედის, ლალი ყანჩაველის განცხადებით, უფლება რომ ჰქონდეს, იური მეჩითოვს დახვრეტდა.

როგორც მან „2020NEWS" -თან საუბარში განაცხადა, მეჩითოვის განცხადება, წინასაარჩევნო კამპანიის ნაწილია.

"მეჩითოვის განცხადებებს ვერ ავყვები. ყველამ ძალიან კარგად იცის, 9 აპრილს რაც მოხდა და სად დაიგეგმა. რა ვქნა? რა ვთქვა ახლა? - ასეთი განცხადებები უნდათ, რომ ამ საარჩევნოდ გამოიყენონ. მე ძალა აღარ შემწევს. 9 აპრილის მოვლენების შემდეგ, 30 წელია ფეხზე არ გამივლია. უფლება რომ მქონდეს, იური მეჩითოვს დავხრეტავდი. ახლა რომ გამოვიდე მე, რამეს იზამენ? - 30 წელია არაფერი გაუკეთებიათ. მარტო ერთმანეთს ებრძვიან. ამ წინასაარჩევნოდ, ვიღაცას, რაღაცის გამოყენება უნდა და მე რატომ უნდა ჩავერიო, შვილს გამიცოცხლებენ თუ რა?!" - განუცხადა „2020NEWS"-ს ლალი ყანჩაველმა.

შეგახსენებთ, რომ „ალ ჯაზირას" მიერ მომზადებულ ფილმში, ფოტოგრაფმა და კულტურის მინისტრის ყოფილმა მოადგილე იური მეჩითოვმა განაცხადა, რომ 1989 წლის 9 აპრილს საბჭოთა კავშირის სადამსჯელო რაზმებს რუსთაველის გამზირზე ნიჩბებით არავინ დაუჩეხავთ და ხალხი ასფიქსიით გარდაიცვალა.

2020news