(რეზონანსი) თითქმის დადასტურებული ინფორმაცია იმაზე, რომ აპირებენ საქართველოს ისტორიაში არჩევნები დანიშნონ სამუშაო დღეს - აცხადებს გაერთიანებული ოპოზიციის პრეზიდენტობის კანდიდატი გრიგოლ ვაშაძე. ვაშაძე ამბობს, რომ ასეთ შემთხვევაში საზღვარგარეთ მცხოვრებ ქართველ ემიგრანტებს არჩევნებში მონაწილეობის საშუალება არ მიეცემათ:

„ჩვენი ძირითადი თხოვნა არის ის, რომ ხელი შეგვიწყონ იმისათვის, რომ საქართველოში პირველად ე.წ. „ქართული ოცნების" ხელისუფლების პირობებში ჩატარდეს ნორმალური არჩევნები. დემოკრატიული, ყოველგვარი ტრიუკების, გაყალბების და ძალადობის გარეშე რაც შეეხება ოპოზიციას. ახლა არის თითქმის დადასტურებული ინფორმაცია იმაზე, რომ აპირებენ საქართველოს ისტორიაში არჩევნები დანიშნონ სამუშაო დღეს. რაც ფაქტიურად არ მისცემს საშუალებას საზღვარგარეთ ლეგალურად მყოფ ჩვენს თანამემამულეს მივიდეს საარჩევნო ყუთებთან. ეს არის აღმაშფოთებელი და კეთდება სპეციალურად იმიტომ რომ ემიგრაციამ თითქმის 100 %-ით ხმა მისცა გაერთიანებულ ოპოზიციას,"-განაცხადა გრიგოლ ვაშაძემ.

გრიგოლ ვაშაძე ჰელსინკში იმყოფება, სადაც ევროპის სახალხო პარტიის კონგრესი მიმდინარეობს. პრეზიდენტობის კანდიდატი ევროპელ ლიდერებს ხვდება.