(რეზონანსი) სომხეთის ქალაქ ეჩმიაძინში ადამიანების ჯგუფმა, რომელიც სრულიად სომეხთა კათოლიკოსის, გარეგინ II-ის გადადგომას ითხოვს, მისი კანცელარიის შენობაში შეჭრა სცადა. ამის შესახებ „ტასს" სომხეთის პოლიციის პრესსამსახურიდან აცნობეს.

„ეჩმიაძინის ტერიტორიაზე მომსახურე სამართალდამცველებმა დემონსტრანტები კანცელარიის შენობაში არ შეუშვეს", - ნათქვამია პოლიციის განცხადებაში. ადგილობრივი მედიის ინფორმაციით, ამ წუთებში დემონსტრანტები კანცელარიის შენობასთან იმყოფებიან და კათოლიკოსის საწინააღმდეგო ლოზუნგებს სკანდირებენ.

კათოლიკოს გარეგინ II-ის გადადგომის მოთხოვნით საპროტესტო აქციები 2018 წლის ივნისში დაიწყო. მომიტინგეები აცხადებენ, რომ კათოლიკოსი საეკლესიო რეფორმების გატარებას აფერხებს. თავის მხრივ, სომხეთის პრემიერ-მინისტრმა ნიკოლ ფაშინიანმა აღნიშნა, რომ სახელმწიფო საეკლესიო საქმეებში ვერ ჩაერევა და მომიტინგეების მოთხოვნების შეფასებაზე უარი განაცხადა.