(რეზონანსი) დავით ყიფიანის სახელობის თასის ყველა ნახევარფინალისტი ცნობილია. მეოთხედფინალური ეტაპის ბოლო მატჩი ლანჩხუთში ქობულეთის „შუქურასა" და ქუთაისის „ტორპედოს" შორის გაიმართა. საქართველოს მოქმედმა ჩემპიონმა 9 წუთში 3 გოლის გატანა მოახერხა.

მატჩის საწყის წუთებში ანგარიში „შუქურამ" გახსნა, გუნდი მე-3 წუთზე ომარ ბულუხაძემ დააწინაურა. 51-ე წუთზე წონასწორობა მერაბ გიგაურმა აღადგინა. 2 წუთში თორნიკე კაპანაძემ თავური დარტყმით ქუთაისლები დააწინაურა, მე-60 წუთზე კი გიორგი ქიმაძემ საბოლოო ანგარიში - 1:3 დააფიქსირა.

„ტორპედოს" გარდა საქართველოს თასის ნახევარფინალში „დინამო თბილისი", „გაგრა" და „თელავი" ითამაშებენ.