ტყიბულელი მეშახტეები 1-ლი ოქტომრიდან ხელფასის გარეშე დარჩნენ და ამის გამო რამდენიმე დღეში გაფიცვას იწყებენ. „არ ვიცით რა ბედი გვეწვევა. გაურკვევლობაში ვართ და თუ ამ დღეებში ისევ არაფერი გაირკვა, ვაპირებთ კვლავ ქუჩაში გავიდეთ. არავინ არაფერს გვეუბნება. ჩვენთვის ცნობილი გახდა, რომ „საქნახშირს“ ჰქონდა მოლაპარაკება მთავრობასთან, გარკვეულ ადგილებში (იქ, სადაც აფეთქება არ მომხდარა) სამუშაოები თუ არ აღდგებოდა, მაშინ  ოქტომბრიდან ხელფასებს აღარ გადაგვიხდიდნენ. მთავრობა დუმს“,- აღნიშნავს გაგა ისაკაძე და ამბობს,  რომ ხელფასების გარეშე დარჩენას, ყველა მეშახტეს ურჩევია ნებისმიერ პირობებში სამუშაოები გაგრძელდეს და ამიტომ მზად არიან შახტში ჩასასვლელად.

ტყიბულის მაღაროში დღეს არსებულ მდგომარეობასთან დაკავშირებით, "კომერსანტი " საქართველოს პროფესიული კავშირის გაერთიანების წრმომადგენლებსაც ესაუბრა. ორგანიზაციის წევრმა დავით დოლაბერიძემ დაადასტურა, რომ მეშახტეებს ხელფასები ნამდვილად აღარ ჩაერიცხებათ. მისი თქმით, „საქნახშირი“-ს  გენერალურმა დირექტორმა ჯამბულ ჯაყელმა განაცხადა, რომ თუ ნახშირმიპოვება არ განახლდა, კომპანია 1-ლი ოქტომბრიდან ხელფასებს ვეღარ გასცემს.